حورية فرغلي بالفيديو: أنا وحيدة وعندي 46 ونفسي أتجوز

"بيحسدوني على إيه؟" سؤال فتحت إجابته أبواب الحزن من جديد أمام النجمة حورية فرغلي، التي نشرت مقطع فيديو كشفت فيه عن شعورها بالوحدة بدون أصدقاء وعدم الزواج رغم بلوغها عامها الـ 46 وقالت إنه لا توجد في حياتها ملامح السعادة التي تستحق الحسد.

أنا مش عارفة الناس بتحسدني على إيه؟

حورية فرغلي نشرت الفيديو عبر حسابها على موقع إنستغرام، بعنوان "بيحسدوني على ايه"، وظهرت فيه حزينة وشاردة وقالت: إيه اللي الناس بتحسدني عليه، أنا قاعدة لوحدي، عندي كلب، ومعنديش صحاب، وتليفوني مبيرنش، بقرأ طول الوقت، عالآيباد طول الوقت، بنزل ألف التراك كل يوم، مبعملش أي حاجة ف حياتي".

وأضافت: "مامي بتجيلي بتزورني، وبروحلها أزورها، بروح لبابي، أخويا كنت قاعدة معاه في السليمانية، بس هو طيار أصلًا دايما مش موجود ومسافر، رانيا صاحبتي جداً بس مبنشوفش بعض كتير لأنها في 6 أكتوبر وأنا هنا."
تابعي المزيد: حورية فرغلي لـ جمهورها: انتظروني بشكل جديد

حورية فرغلي: نفسي أتجوز وأعمل عائلة

وتابعت: " أنا مش عارفة الناس بتحسدني على إيه، أنا عندي 46 سنة نفسي أتجوز ويكون عندي عيلة ونفسي معيش لوحدي، وده محصلش لغاية دلوقتي، فأنا مش عارفة هما حاسدني على إيه بالظبط."

حورية فرغلي خضعت لجراحة استئصال الرحم

وسبق أن كشفت الفنانة حورية فرغلي تفاصيل حالتها الصحية، وذلك بعدما أجرت عملية استئصال الرحم بعد اكتشاف وجود أورام، وقالت إنها راضية بقضاء الله وقدره، ومستسلمة لحقيقة أن الله لم يكتب لها الزواج والإنجاب.

وأضافت «حورية» في مداخلة هاتفية ببرنامج «حضرة المواطن»: «أنا من زمان عندي أورام وشيلتها، والدكتور قال لي قدامك كام سنة وحاولي تتجوزي علشان تعرفي تخلفي طفل، وبعد كده نشيل الرحم».

وتابعت: «ذهبت لعمل أشعة على الرحم لقيت فيه ورم، ولازم الرحم يتشال قلت الحمد لله ربنا مش كاتب لي الجواز، ومش متضايقة وراضية بقضاء الله، وشكراً لكل اللي دعوا ليا».

حورية فرغلي عرفت الحب مرة واحدة فقط

وتحدثت حورية فرغلي، عن ذكرياتها مع خطيبها الذي توفي قبل يوم واحد من حفل الزفاف، مؤكدة أنه الرجل الوحيد التي أحبته، ورغم مرور 21 عاماً على رحيله، لم تقدر على الوقوع في حب رجل آخر، وقالت إنها تعرضت لصدمة بسبب انفصال والديها بعد 48 ساعة فقط من ولادتها.

أضافت حورية فرغلي في حوار مع الفنان تامر شلتوت لبرنامج "في العمق": أنا شُفت الحب مرة واحدة في حياتي سنة 2002، مع خطيبي اللي توفي، ومن بعده محبتش حد تاني رغم مرور 21 سنة، خطيبي اللي مات كان 175 كيلو، وكان عنده مشكلة في رجله الشمال، فكان يعاني من مشكلة خلال المشي، وكنا قد بعض في السن.

حورية فرغلي: كنت أراه أجمل رجل في العالم

وتابعت حورية فرغلي: رغم مرضه لكن كنت بشوفه أحلى راجل في الدنيا، والناس كلها تقول إيه الجنان ده، لكن مكنتش ببص لكلامهم بصيت لقلبه واللي جواه، كفاية أني سامعة صوته، كفاية وجوده في المكان ريحة برفانه، من ساعة ما مات وأنا مش لاقية حد غيره.

وواصلت قائلة: قضينا سنتين سوا متخانقناش مرة، كل ما أطلع الاولى في الفروسية أروح البيت ألاقيه جايب لي تورتة كبيرة عليها صورتي ولعب، بدور على حبه مش لاقية، ساعات بقول لنفسي أنا شُفت الحب ده كله ليه لما في الآخر هيتاخد مني، لكن ربنا اللي عايز كده.

وأضافت فرغلي: من بعد وفاته مرتبطش بحد ولا حد أتقدم لي، رغم مرور 21 سنة مشوفتش زيه، مش عارفة ليه، بتحب كتير بس بتصدم لما أعرف السن، وفي شاب بعت لي رسالة طويلة يعبر فيها عن حبه لي، قلت له أنت عندك كام سنة، قالي 22 سنة قُلت له انت قولي يا طنط.

وتابعت حورية فرغلي: أنا معنديش صحاب ومبخرجش خالص، وبحب الحيوانات جداً، كان عندي 13 كلباً دلوقتي بقا 1، وعندي 8 أحصنة، مبخرجش مع الناس لان محدش بيعزمني على حاجة، اتعودت اعيش لوحدي وبراحتي، بيتهيء لي لو أتجوزت مش هستحمل حد ينام جمبي على السرير، كمان هيبقى في مشكلة، لأني بحب أمشي في شقتي براحتي واجري مع الكلاب، مش شرط كل يوم ميكب وشعر ورموش، أنا باكل ضوافري أصلاً.

حورية فرغلي: طفولتي كانت صعبة

وتحدثت حورية فرغلي عن أكبر صدمة أثرت على حياتها منذ الطفولة قائلة: طفولتي كانت صعبة، بابا وماما انفصلوا وأنا عندي 48 ساعة، أكتر حاجة عايزة أنساها هي طفولتي، لأني أتحرمت من الطفولة والمراهقة.

وتابعت: الدادة بتاعتي كانت أحن واحدة عليّ، كانت فلبينية وقعدت معايا لحد ما بقى عندها 73 سنة وماتت، كنت بقولها يا تيتا، زوج ماما كان حنين عليّ، وزوجة بابا ماتت في غارة من غارات العراق، ورأسها طارت قدام عيالها ماتت موتة صعبة.

وواصلت حديثها قائلة: بسبب حجم الأذى وأزمات الطفولة، أنا قعدت لـ 8 سنين مبتكلمش، ولا بنطق خالص، الدكتور قال لماما بنتك مبتتكلمش، لأنها محتاجة حب وحنان كتير.

كما تطرقت حورية فرغلي إلى أخطائها، ومدى استعداها للموت، حيث قالت: غلطتي أني مش محجبة، لكن بصلي وبصوم وبطلع زكاة، وحجيت 7 مرات، لكن معملتش ولا عمرة عشان كان لازم يكون معايا محرم، وأواظب بشكل يومي على قراءة سورة الملك قبل ما أنام، وبدعي ربنا يثبتني عند السؤال.

لمشاهدة أجمل صور المشاهير زوروا «إنستغرام سيدتي»

وللاطلاع على فيديوغراف المشاهير زوروا «تيك توك سيدتي»

ويمكنكم متابعة آخر أخبار النجوم عبر «تويتر» «سيدتي فن»

ملحوظة: مضمون هذا الخبر تم كتابته بواسطة سيدتى ولا يعبر عن وجهة نظر مصر اليوم وانما تم نقله بمحتواه كما هو من سيدتى ونحن غير مسئولين عن محتوى الخبر والعهدة علي المصدر السابق ذكرة.

مشاركة الخبر: حورية فرغلي بالفيديو: أنا وحيدة وعندي 46 ونفسي أتجوز على وسائل التواصل من نيوز فور مي