بوسي تتراجع عن الإشادة بطليقها ونادمة على كلمات الحب

كشفت المطربة بوسي عن ندمها على عبارات الغزل والحب لطليقها مصفف الشعر هشام ربيع، التي تفوهت بها أثناء حضورها ضيفة على برنامج "العرافة"، مؤكدة أنها قالت هذه العبارات باتفاق وتحريض من مقدمة البرنامج بسمة وهبة التي وعدتها بعودة المياه إلى مجاريها، ولكنها صدمت لاحقا بتصريحات طليقها الذي اتهمها بالكذب والسعي لخراب حياته العائلية.

بوسي تعاتب بسمة وهبة

بوسي أرسلت رسالة عتاب صوتية إلى بسمة وهبة نشرتها الأخيرة عبر حسابها الرسمي على موقع إنستغرام، قالت فيها: شفتي يا بسمة اللي قعدتي تدافعي عنه وقعدتي قوليله بحبك واتكلمت عليه كلام كويس، أنا ندمانة إن قلت الكلمة دي وسمعت كلامك، مكانش ينفع أقول الكلمة دي، شوفي طالع بيقول إيه عليا وبيتكلم في سيرتي وعرضي وشرفي.

تابعي المزيد: بالفيديو.. بسمة وهبة تتسبب في دخول بوسي بنوبة بكاء خلال استضافتها في العرافة

بوسي: دي تربيتي وأخلاقي

وأضافت المطربة بوسي: مع إن من ساعة ما حصلت المشاكل عمري ما جبت سيرته بكلمة وحشة ولا قلت عليه كلمة وحشة، ولا خضت في شرفه ولا في عرضه، أنا عمري ما أعمل كده عشان دي تربيتي وأخلاقي، ده الفرق بين تربية شارع الهرم والكباريهات وتربية ابن الناس وابن الأصول اللي بيفهم في الأصول الفلاح، اللي عنده بنات وإخوات، معملش حساب للكلام ده.

بوسي: طليقي يبحث عن الشهرة على حساب العيش والملح

وتابعت بوسي: مكنتش متخيلة إن الشهرة شغلاه على قفا الست اللي كانت مراته في يوم من الأيام، واللي كانت بتنام جنبه على سرير واحد وبياكلوا مع بعض عيش وملح.

واختتمت حديثها قائلة: مصدومة ومعنديش كلام أقوله، بجد مش عارفة أقول إيه والمشكلة أن يوم التصوير بعد الحلقة جه واتعشى معايا وعلاقتنا كويسة جدا، بس مكنتش متخيلة إن بعد الكلام الكويس وإني بدافع عنه واطلعه مظلوم وبريء يبقى ده جزائي، مش قادرة أقول غير حسبي الله ونعم الوكيل، مش عامل حساب للشهر الفضيل وإنه بيعمل عمرة وفي الكعبة، وبيتكلم عن مراته.

هشام ربيع يرد على تصريحات زوجته السابقة بوسي

يذكر أن هشام ربيع، رد على تصريحات طليقته المطربة بوسي، في برنامج “العرافة”، الذي تقدّمه الإعلامية بسمة وهبة، مؤكدًا أن كل كلامها كذب وافتراء، ويمكن أن يتسبّب في خراب البيوت.

وأكد هشام في مقطع فيديو تم بثه على مواقع التواصل الاجتماعي أن كل الردود بتاعتها كذب، وأنا بصراحة مقدرتش أسكت، كنت لازم أدخل، وأوضّح لكل الناس، وبالذات أصحابي، وأهلي أن الست دي كلامها كذب وبتتنفس كذب.

ولما سألتها بسمة سؤال واضح وصريح، هو سبب الانفصال بينكم إيه؟، فردّت بوسي قالت لها أصل الناس كانت بتقوله كلام في ودنه وكلام كده لا يعقل يعني.

هشام ربيع: هذا السبب الحقيقي للطلاق

وأضاف: “أنا بعرفكم وبقولكم الحقيقة، طلّقت بوسي لأن دخلت بسببها السجن أربعة شهور، ودفعت عشانها ملايين، وخلّصتها من تشكيل عصابي، مكوّن من طليقها الله يرحمه ويسامحه، وعيلته، وخلّيتها حرة اللهم لك الحمد.

وفي الآخر الست دي مجتش زارتني، خلال الأربعة شهور، وفي كشوفات في السجن تثبت ده، عشان هي بتكذب كتير، وخرجت من السجن بتتهرب مني، وقافلة باب البيت، ومش عايزة تقابلني، وده اللي جاب ليا صاعقة ولاقيت نفسي هتجنن، الست دي مش قادر أفهم هي معقدة ومريضة، وبتاعت مصلحتها وغدّارة، أنا مش فاهم حاجة، طب أنا كهشام معملتش فيكي حاجة، ومع ذلك قلت أنتي بالنسبالي غلطة وأسأت الاختيار، غلطت وإحنا بشر وممكن نغلط، وخلاص هصلح الغلط بأني أطلّق الست دي.

وأردف بالقول: “بوسي اعتبرت إن شهامتي ورجولتي، أنا عملتها مع واحدة في الشارع، أو مع جارتي أو أختي أو زوجتي، ودي تربيتي عشان أنا راجل شرقاوي وفلاّح، وده طبعنا، مش هشوف واحدة ست بتستغيث واسكت، ولكن الست دي طلعت ندلة جداً معايا، ولا جت زارتني اللي أنا مسجون عشانها، ولما طلعت من السجن قابلتني، دي اتهربت وكأن شيئاً لم يكن”.

هشام ربيع يكشف عن مفاجأة

وفجّر هشام ربيع، مفاجأة من العيار الثقيل، حين قال إنه اكتشف أن طليقته كانت متزوجة مرتين قبل زواجهما، ولم تخبره بذلك، معلقاً: “اكتشفت حاجات غريبة أوي، وهي إن الست دي كانت متجوّزة قبلي اتنين، وأنا معرفش، اللي كنت أعرفه فطين اللي هو وليد أبو ياسين، التاني اللي في النص ده أنا معرفوش”.

وأضاف: “بدأت حياتها معايا بكذب، إن هي كانت متجوّزة قبلي ومقلتش ليا، حتى أنا قلتلها إزاي يا بوسي نحط إيدينا في إيدين بعض، وإحنا جواز على سُنّة الله ورسوله وفرح وعيلة محترمة وأسرة ونسب، وفي الآخر إنتي متجوّزة قبلي ومقولتيش ليا، طبعاً مكنش ليها رد، لأن كان الموضوع اتعرف، وكنت آخر من يعلم.

بوسي طالعة بتقول إنها لسه بتحبني، طب مش تعرف إن إحنا كعادات وتقاليد ومبادئ، إحنا انفصلنا واطلقنا وكل واحد راح لحاله، طيب مش تعرف إن بحبك دي تخرب بيت، وده اللي حصل عندي فعلًا، حصل مشاكل في بيتي، هل هي عايزة تخرب بيتي؟”.

واختتم هشام ربيع حديثه قائلاً: “أنا مش عملت حاجة لبوسي، كل اللي عملته إني دافعت وانسجنت، ودفعت ملايين عشان خاطرها، وفي الآخر طلعت ندلة ومش جدعة، ومش عاوزة تعترف بكده، يعني هي كمان ناكرة للجميل، ليه اللفّ والدوران في كلامك بالبرنامج، بدأت أصدق كل الكلام اللي كان بيتقال عنك قبل كده، بعد اللي عملتيه معايا.

وأضاف ربيع، موضوع بحبك دي تخرب بيت وفي أسرة وأولاد، طب ليه عايزة تدمر حياتي، أنا عملت فيكي إيه؟ بقولك الله يسهّلك، إحنا في شهر كريم، ومش عاوز أتكلم في أي حاجة أكتر من كده، مع إن عندي كلام كتير، عايز أقوله، بس مينفعش عشان مخضش في أعراض، ومدخلش في حاجات، هخلّي كل حاجة لوقتها، ولكن الله يسهّلها ربّنا يهديها”.

لمشاهدة أجمل صور المشاهير زوروا «إنستغرام سيدتي».

وللاطلاع على فيديوغراف المشاهير زوروا «تيك توك سيدتي».

ويمكنكم متابعة آخر أخبار النجوم عبر «تويتر» «سيدتي فن».

ملحوظة: مضمون هذا الخبر تم كتابته بواسطة سيدتى ولا يعبر عن وجهة نظر مصر اليوم وانما تم نقله بمحتواه كما هو من سيدتى ونحن غير مسئولين عن محتوى الخبر والعهدة علي المصدر السابق ذكرة.

مشاركة الخبر: بوسي تتراجع عن الإشادة بطليقها ونادمة على كلمات الحب على وسائل التواصل من نيوز فور مي