لو فاكرة الراجل ما يعيبوش إلا جيبه.. اعرفى حكايات البنات مع "بخل المشاعر"

"الراجل ما يعيبوش إلا جيبه" مقولة شعبية نسمعها كثيرًا، وتجعل النفقات المالية أول ما يخطر ببالنا حين نسمع عن أن رجلا عيبه هو البخل، إلا أن وجهًا آخر للبخل عايشته الفتيات مع رجال يبخلون بما لا يقدر بمال، وهو البخل بمشاعرهم واهتمامهم واحترامهم، فكيف كانت تجربتهن مع الرجل بخيل المشاعر؟ 

"اللي تتهاون مرة هتفضل طول الوقت متهانة"

"كله إلا بخل الراجل في تقديره للست اللي معاه، خصوصًا قدام الناس، ولو تهاونت مرة هتفضل طول الوقت متهانة" هكذا لخصت آية. م صاحبة الـ 25 عاما، حكايتها مع الرجل بخيل المشاعر، وعن تفاصيلها قالت إنها تعرفت على شاب يكبرها بحوالي 10 سنوات، صاحب مركز مرموق، بعد مدة ليست بكبيرة من التعارف قرر الارتباط الرسمي بها حين رأى شخصيتها ملائمة له، وأضافت: "كنا متفاهمين لأبعد الحدود في اول فترة الارتباط، ومكانش باين عليه أي عيوب، إلا إني اتصدمت فيه خصوصاً لما بنخرج مع أصحابه".

أهانة الزوجة

وأوضحت: "طول ما أنا معاه لوحدينا بيبقى كويس، لكن في أي تجمع بيتحول 180 درجة، بيبقى شخص بخيل في إظهار حبه قدام الناس، وممكن جدًا يتريق عليا كمان قصادهم"، وتابعت "مستحملتش الوضع ده خصوصًا بعد ما نبهته أكتر من مرة للحاجات اللي بتزعلني، وكان رده مفاجأة كبيرة بالنسبالي لما قال لي أنا جايبلك الشبكة بالشيء الفلاني عشان تعملي بس اللي أحبه وتتقبلي تصرفاتي زي ما هي". 

"بخل الفلوس كوم والكسرة النفس كوم تاني":

أما سمر.أ صاحبة الـ 35 عامًا فكانت تجربتها رحلة زواج استمرت 10 سنوات قالت عنها "10 سنين مفيش كلمة شكرًا، ولا حتى ابتسامة على أي حاجة بعملها، لحد ما وصل أني كنت متأخرة في حملي لمدة 4 سنوات وأول ما حملت وجيت أعرفه قالي وايه يعني ما الحيوانات بتحمل وتولد"

جاء رد زوج سمر في أهم لحظة من لحظات حياتها كصدمة عمر، رجل اختارته لتعيش معه باقي عمرها وكانت تسعى بكل الطرق لتكون أمًا لطفل منه إلا أن الرد القاسي والتجاهل على حد تعبيرها كان القشة التي قصمت ظهر البعير.

الخلافات الزوجية

تابعت: "وقتها سكت واستحملت وحاولت أفرح نفسي بنفسي، ومع كل مناسبة يتجاهلني فيها أو يرد رد يحزنني على سنيني معاه الاقي خطوة الانفصال بتقرب، لحد ما انفصلت عنه من سنة وعايشة مع ابني لوحدنا في بيته برضه لأنه رفض أني أسيب بيتي" وأضافت: "عمره ما كان بخيل ماديًا معايا أو مع ابنه، بس كله إلا كسرة النفس وتجاهل فرحتي بحاجة أنا بتمناها، بخل الفلوس كوم، وكسرة النفس كوم تاني". 

"بخيل الجاه"

أما عن مها صاحبة الـ 36 عامًا قالت إنها تزوجت من شخص الجميع كانوا يحسدونها عليه من شدة كرمة وإنفاقه ببذخ عليها وعلى بيتها، إلا أنها مع الوقت والعشرة تحديداً بعد توليه منصباً كبيراً واجهت المشكلة الكبرى: "مبقاش يحترم حد أقل منه في الوضع والمكانة، بقى يخجل مني بالرغم من أنه مبخلش بأي حاجة ليا، بس بقى يخفيني عن أي احتفالات يتعزم عليها، بقى شايف أني مش واجهة له، ولا ينفع أظهر معاه بهيئتي، مع أني شيك وبلبس غالي وكويس".

وأضافت: "قلت مستعجلش وأخرب بيتي مع زيادة المشاكل وخصوصاً إن معايا طفلين منه، لكن لما لقيته بدأ يستعر من أمه وأبوه عرفت ساعتها أنه عمره ما هيكون له خير فيا ولا في أولاده". 

رجل متكبر

واختتمت قائلة إن من أشد أنواع البخل أن الراجل يبخل على أهله بأنهم يفخرون به وبنجاحه، وأنه يستعر منهم ولا يحب مودتهم.

مشاركة الخبر: لو فاكرة الراجل ما يعيبوش إلا جيبه.. اعرفى حكايات البنات مع "بخل المشاعر" على وسائل التواصل من نيوز فور مي