روحتى؟ أشهر تلميحات الشباب للارتباط اهتمام ولا حركات مفقوسة؟

يعرف الجميع أن الاهتمام هو أسهل طريق للقلب، خاصة قلب البنات، لذا يستخدم العديد من الشباب كلمات شهيرة أصبحت كل فتاة تعرف أنها تلميح للارتباط أو محاولة للفت نظرها إلى أنه يهتم بها ومحاولة لخلق مساحة لنفسه فى حياتها، فما هي هذه الكلمات التى أصبحت الفتيات تعتبرها تلميحًا للرغبة فى الارتباط؟ وكيف تراها؟ 

البنات: كلهم بيقولوا "روحتى" فى الأول
 

فى الصدارة تأتى كلمة "روحتى؟" التى يستخدمها غالبية الشباب حتى تشعر الفتاة بأنها نالت حبه واهتمامه كما قالت سمر صاحبة الـ 30 عامًا، وأضافت: "مفيش إبداع، مفيش ولد عرفته إلا بعد ما ياخد رقمي يحصل سيول من الاهتمام، ولو نازلة تحت أجيب فينو يتصل يتطمن عليا إني روحت"، وتابعت: "البنات بقوا غير الأول بيفهموا التلميحات دي وعارفينها وحافظينها". 

روحتي

أما سما صاحبة الـ 20 عامًا فقالت: "ميزة البنات إنهم بيحبوا يخدموا بعض ويجاملوا بعض، وبيحكوا لبعض كل حاجة، فتلاقينا في الارتباط مش قد كدة"، وتابعت ضاحكة: "كان فيه واحد اتعرف عليا انا وصاحبتي، وكان يتصل يسألني روحتي، وبعد ما يقفل معايا يتصل يسألها هي كمان روحتي، قلبه كبير وكان إنسان بجد".

"الفترة الأولى من العلاقة تاخدي كل الاهتمام منه، بعدها متجنيش غير اهمال وقسوة"، هكذا بدأت ميرنا صاحبة الـ 34 عامًا حديثها وأضافت :"تلاقي الراجل من دول بيبقى فاضي ورايق وعاوز يسمع حكاياتك كلها، ويفضل يتحايل أنك تحكيله عن يومك ماشي إزاي، لحد ما يضمن وجودك وتعلقك بيه".

الاهتمام

الشباب.. المورننج تكست والتوصيلة أهم التلميحات:
 

قال أحمد صاحب الـ 39 عامًا أن الرسائل الصباحية أو "المورننج تكست" تعد طريقة سحرية للتلميح بالرغبة فى الارتباط، وتابع: "بيظلمونا على فكرة، حتى لو بنلمح وبعدها محصلش نصيب ما هي فترة الارتباط دي فترة تعارف ممكن نكمل وممكن منكملش"، وأردف: "البنات الأوفر هما اللي بيعموا كدة في نفسهم، لو هي مدتش فرصة لحد يقرب منها من البداية وتكون عارفة وعاقلة لطبيعة اهتمامه بيها وطريقته، مش هتفهمه غلط والدنيا هتمشي".

أما  محمد صاحب الـ 28 عامًا قال: "البنات بيحبوا الاهتمام في المطلق وحساسيتهم وطبيعتهم بتخليهم يتخيلوا أن الاهتمام ده محاولة للارتباط"، وتابع: "أنا عن نفسي كنت بوصل زميلتي يومياً، عشان هي قريبة من بيتي ومن طريقي، اتفاجئت أن كل الناس فاهمة أننا مرتبطين، ولما هي عرفت وأنا اتكملت معاها لاقيتها هي كمان فاهمة إننا مرتبطين عشان بس بوصلها".

فيما قال محمد صاحب الـ 40 عامًا: "الوضوح والصراحة في كل العلاقات سواء كانت زمالة أو علاقة حب بتريح، اما اللف والدوران ده سبب كل المشاكل"، وتابع: "لو كل ولد يراعي ربنا ويتكلم وهو عارف حدوده، والبنات بتحط خطوط حمراء في التعامل معاها وطريقة السؤال عليها مكناش شوفنا كمية الوجع والقلوب المكسورة من بنات كتير"، وأردف: "لازم نحط حدود في تعاملتنا، مش عيب أنك أو إنك ترتبطوا، العيب أن الإنسان ميكونش واضح وواخد الموضوع هواية وتسلية"

قلب مكسور